کابل ټکی کام (سه شنبه، ۱۴ لیندۍ، ۱۴۰۲ل)
وروسته له هغه چې اسراییلي رسنیو د صهیونیستي ریژیم د استخباراتي ادارې موساد د چارواکو د هغې پټې غونډې راز افشا کړ، چې په کې د ترکیې په ګډون په ځینو بهرنیو هیوادونو کې د حماس اسلامي غورځنګ او نورو فلسطیني ډلو د مشرانو د وژلو یا نیولو په اړه پلان نیولو خبره شوې وه. د ترکیې د کورنیو چارو وزیر یې په وړاندې کلک غبرګون ښودلی او صهیونیستي ریژیم ته یې خبرداری ورکړی، که زموږ په خاوره کې مو د حماس د مشرانو د وژلو هڅه وکړه له غاښ ماتونکي ځواب سره به مخ شئ.
اسراییلي رسنیو تېره ورځ راپور ورکړ چې د صهیونیست ریژیم د استخباراتي ادارې موساد چارواکو په غزه کې د فلسطیني مقاومتي ډلو پر وړاندې د پلان “A” تر نا کامېدو وروسته د پلان “B” په عملي کولو غور کړی چې په کې په ترکیه، لبنان او قطر کې د حماس اسلامي غورځنګ او اسلامي جهاد په ګډون د فلسطیني مقاومتي ډلو د مهمو مشرانو له منځه وړل شامل دي.
که څه هم قطر او لبنان د اسراییلي استخباراتي ادارې موساد د وروستي تصمیم په تړاو څه نه دي ویلي؛ خو په تېر کې د اسراییلو د استخباراتي ادارې موساد اجنټان توانیدلي چې په بهرنیو هیوادونو کې د “الفتح او حماس” ګوندونو مشران په شهادت ورسوي.
د ویلو ده چې د اسراییلي استخباراتو وروستی پلان د حماس لبنان مېشتي مشر ” اسامه حمدان” یوه خندونکې ډرامه بللې او په خبره یې صهیونیستانو د غزې د اېل کولو لپاره ۵۵ ورځې وحشي هوایي بریدونه او په شمالي غزه کې ځمکني عملیات ترسره کړل؛ خو څه یې لاس ته را نه وړل اوس په تشو ګواښونو د نړۍ او خپل ولس د تېر ایستلو هڅه کوي.
