کابل ټکی کام (سه شنبه، ۳ سلواغه، ۱۴۰۲ل)
راپور: خالد افغان
د اسراییلو اشغالګرو عسکرو دا ځل د غزې د ملکیانو له عامه وژنې وروسته دا ځل د غزې د لرغونو اثارو لوټ او غلا ته مخه کړې ده. په هغه ویډیوګانو کې چې په خواله رسنیو خپرې شوي پکې لیدل کیږي چې یو شمېر اشغالګر اسراییل لرغونو سمڅو ته ننوځي او لرغونې اثار غلا کوي.
د لرغونو اثارو د لوټ ویډیو وروسته له هغه لاس په لاس شوه چې لومړی دا ویډیو د غزې د لرغونې اثارو د ساتنې مشر په خپل انسټګرام خپره کړه. په غزه کې د لرغونو اثارو د ساتنې مسوول ویلي چې اوسمهال د اسراییلو عسکر په لرغونو اثارو پسې ګرځي او له ځانونو سره یې وړي.
په خپرو شویو انځورنو او ویډیو کې ښکاري چې یو شمېر خټین جکونه او منګي د اسراییلو عسکرو په لاس کې یو خوا بل خوا کیږي.
له بل پلو د لرغونو اثارو یو شمېر پېژندونکي وایي چې د یرغل او جګړې په حال کې څوک حق نه لري چې د یوې سیمې لرغوني اثار غلا کړي او یا یې هم له ځانونو سره یوسي. دوی وایي چې دا کړنه د بشري حقونو څخه ښکاره سرغړونه ده.
د بي بي سي د مرکزي څانګې خبریالان وایي چې د اسراییلو د لرغونو اثارو د ساتنې له ادارې سره یې د دې خبر د پخلي او یا رد په پار اړیکه کړې خو هغوی یې ټیلیفون ته ځواب نه دی ویلی.
فلسطین د لرغونو اثارو د مخینې له مخې د نړۍ یو تر ټولو غني هیواد شمېرل کیږي. یو شمېر لرغونپوهان ادعا کوي چې فلسطین په یوازې ځان د مصر او عربو د لرغونیا ځوابګر کېدای شي. دوی وایي چې د لرغونو پانګو د لرنې له مخې فلسطین نه یوازې د مصر سیالۍ کولی شي؛ بلکې د ټولو نړۍ لرغونې سیمې ننګولی شي. له بلې خوا داسې ویل کیږي چې اشغالګر صهیونسټ له لسیزو پخوا د فلسطین د لرغونو اثارو د له منځه وړنې پلان درلود. د اسراییلو د لرغونپوهنې ادارې د فلسطین ټولې لرغونې سیمې په نښه کړي او د له منځه وړلو لپاره یې پروژه وي کسان ګومارلي دي.
دمګړۍ په غزه کې ټولې لرغونې سیمې د اسراییلو تر بریدونو لاندې دي او شوني ده چې ګڼې سیمې یې له منځه وړي وي.
تر دې وړاندې هم اشغالګرو له د فلسطین له قدس، نابلس، الخلیل، بیت لحم او نورو لرغونو سیمو اثار خپل هیواد ته قاچاق کړي وو.
داسې اټکل کیږي چې اسراییل شعوري لګیا دي څو د فلسطین هویت مسخه کړي او په یوه بېګانه هیواد یې بدل کړي. اسراییلي اشغالګرو په تېر کې هم د فلسطین ګڼ تاریخي او مذهبي ځایونه په نښه کړي وو.
د فلسطین پر لرغونو اثارو بلوسېدل دا په ډاګه کوي چې دا مصنوعي هیواد د فلسطین په مسخې پسې راخیستې ده. لرغونپوهان د اسراییلو دا چاره له ټولو نړیوالو آرونو سره په ټکر کې بولي او د اسراییلو دا کړنه ناعادلانه ګڼي.
