کابل ټکی کام (سه شنبه، ۱۷ سلواغه، ۱۴۰۲ل)
د حماس اسلامي غورځنګ پوځي څانګې یا القسام وړمه ورځ ویلي چې په غزه کې یې اسراییلو اشغالګرو ته ګڼه مرګ ژوبله وراړولې او تر ۵۰ ډېرې شوبلې یې د اور خوراک کړي. د القسام عملیاتي څانګې ویاند ابو عبیده په خپل ټیلیګرام لیکلي چې ځواکونو یې په تېرو څو ورځو کې نږدې ۵۰ پوځي ټانکونه ویجاړ کړي او لسګونه اسراییل یې پکې مړه او ټپیان کړي دي.
ابوعبیده وایي چې ځواکونو یې د دوښمن پوځي مرکزونه او الوتکې هم په نښه کړي دي. اسراییلي رسنۍ خپلو عسکرو ته د مرګ ژوبلې د راپورنو پخلی کوي. دوی یوازې په غزه کې د سلګونو عسکرو مړینه منلې ده.
القسام څرګندوي چې په خان یونس کې یې ځواکونه له دوښمن سره په جګړه دي، خو دوښمن خپله غوسه د بې ګناه ملکیانو په وژنه سړوي. د القسام ویاند وایي چې اسراییلي اشغالګرو لا هم پر ملکیانو ړندې بمبارۍ کوي.
بل پلو، د یمن حوثي ځواکونو مدعي دي چې په سره سمندرګي کې یې یوه امریکایۍ او بله بریتانوۍ سوداګریزې بېړۍ په نښه کړي دي. د حوثیانو ویاند يحيی سريع په یوه ویډيوي پیغام کې د دې برید مسؤلیت منلی او زیاته کړې یې ده، چې په عربو او سره سمندرګي کې به خپلو بریدونو ته لا زور ورکړي.
د اروپا یوې څېړنیزې ادارې لیکلي چې د حوثي ځواکونو د بریدونو له کبله ورته د میلیاردونو ډالرو زیان اوښتی دی. دا اداره په خپله یوه څېړنه کې وایي چې د حوثي ځواکونو له کبله د امریکا، بریتانیې او اسراییلو سوداګرۍ او نفتي کښتۍ خوندي نه دي. دوی ادعا کوي چې د اکتوبر له اوومې وروسته په هره ګړۍ کې تر ۳۰۰ میلیونو ډالر ډېر زیان ویني. دا څېړنیز راپور په سره او عربو سمندرګي کې د سوداګریزو بېړیو د املاکو هلاکېدل، د ټرافیک ګڼه ګوڼه، بېړیو ته د اوږدو او بدیلو لاره ټاکنه، د امنیتي ځواکونو زیاتول او نور هغه سببونه یادوي چې په مټ یې تل ابیب، واشنګټن او لندن ته په یوه ساعت کې تر ۳۰۰ میلیونو ډالرو ډېر زیان رسیږي.
بل پلو دانیل هاګاري د اسراییلو د پوځ ویاند وایي چې د اکتوبر له اوومې راهیسې یې د حزب الله ځواکونو پر پټنځایونو شاوخوا ۴۰۰۰ هوایي بریدونه کړي او د دوی ۲۰۰ لوی او کوچني قومندانان یې وژلي دي. پنټاګون ګواښ کوي چې دوی او متحدینو ته یې د وراوښتي زیان غچ له تهران څخه اخلي.
بلخوا تازه د امریکا د بهرنیو چارو وزیر انټوني بلېنکن منځني ختیځ ته د خپل سفر په ترڅ کې
پرون د سعودي عربستان له ولیعهد محمد بن سلمان سره وکتل. ویل کیږي چې د اکتوبر له اوومې وروسته دا د نوموړي سیمې ته پینځم سفر دی.
د غزې د جګړې له پیله دا سیمې ته د هغه پنځم سفر دی. بلېنکن هیله لري چې د دې سفر پر مهال به په منځني ختیځ کې د احتمالي اوربند، له جګړې وروسته د غزې لپاره د پلانونو او په سیمه کې د کړکېچ د کمولو لپاره د ده هڅې نتیجه ورکړي.
دا په داسې حال کې ده چې لوېدیځ او امریکا په سیده او ناسیده توګه د اسراییلو ننګه کوي او هر ډول مادي او معنوي ملا یې تړي. رویټرز وړمه ورځ په یوه خبر کې ویلي چې امریکا ښایي له اسراییلو سره د ۱۷.۶ میلیاردو ډالرو مرسته وکړي.
