کابل ټکی کام (جمعه، ۱۱ کب، ۱۴۰۲ل)
له هغه وروسته چې د غزې تړنګې په “رفع” ښار د اسرائیلي ریژیم په وحشیانه- ترهګریزو هوایي بریدونو کې مرستو ته راټول شوي ۱۰۰ تنه فلسطینیان په شهادت ورسیدل او په غبرګون کې یې حماس اسلامي غورځنګ صهیونیستي ريژیم سره د اوربند او بندیانو د خلاصولو په اړه روانې خبرې وځنډولې. د اسرائیلي ترهګر ریژیم لومړي وزیر “نتنیاهو” ویلي، چې حماس خبرې نه بلکې تسلیمي ورڅخه غواړي.
د نتیناهو په خبره: برید په تېروتنه کې ترسره شوی دی او دوی یې په اړه پلټنې پیل کړي او منځګړو هېوادونو ته ډاډ ورکوي، چې پکې ښکیل کسان به محاکمه کړي؛ خو حماس غورځنګ ادعا کوي، چې برید په قصدي ډول ترسره شوی او غورځنګ به یې تر هغو خبرې پیل نکړي، چې د برید په اړه د جرمونو نړیوالې محکمې د نتیاهو په ګډون په یاده قضیه کې ښکیل کسان د محاکمې میز ته نه وي راکش کړي.
نتنیاهو دغه راز ویلي، چې حماس په خبرو باور نلري او له دوی د تسلیمي غوښتنه کوي، چې په خبره یې دا امکان نلري.
په ورته مهال ترکیې، قطر، مصر او اردن د اسرائیلو وروستی برید غندلی او یاد هېواد یې تورن کړی، چې د خبرو اترو په مخ کې خنډونه جوړوي او نه غواړي روانه خونړۍ جګړه پای ته ورسیږي.
د ویلو ده، چې د اسرائیلو په پارلمان کې اپوزیسیون/ حزب اختلاف ګوندونو هم پر “رفع” ښار وروستی برید غندلی. نتنیاهو یې تورن کړی، چې د اسرائیلو حیثیت ته یې زیان رسولی، له نتنیاهو یې د استعفاء ورکولو غوښتنه کړې ده او ګواښ کړی، که په خپله خوښه له واکه لاس پر سر نه شي دوی به یې په زور لرې کړي، یاد ګوندونه وایي، چې ترڅو نتنیاهو په واک کې وي حماس سره خبرې پایله نه ورکوي او هېڅ کوم اسرائیلي بندي به بېرته راستون نه شي.
