سوریه؛ د اسرائیلي اشغالګرو د تېرې شپې په برید کې ۴۰ پوځیان وژل شوي
کابل ټکی کام (دوشنبه، ۱۳ وری، ۱۴۰۳ل)
د راپورونو له مخې د سوریې پر پلازمېنه “دمشق” د اسرائیلي اشغالګرو د تېرې ورځې په وحشیانه هوایي بریدونو کې ۴۰ تنه پوځيان وژل شوي او ګڼ نور ټپیان دي.
د سوریې دولتي تلویزیون د یاد هېواد د وسله والو ځواکونو د ویاند په حواله خبر ورکړی، چې یاد بریدونه تېره شپه ناوخته پلازمینې دمشق ته څېرمه په څو پوځي اډو ترسره شوي، چې ګڼو کسانو ته پکې مرګ ژوبله اوښتې ده.
د سوریې د بشري حقونو د څار لندن میشتي سازمان د یوې اعلامیې په خپرولو سره د اسرائیلو بریدونو کې د اوښتو تلفاتو د زیاتوالي په تړاو اندېښنه ښودلی او په خبره یې ګڼ ټپیان لا هم تر خاورو لاندې دي.
د ویلو ده، چې وړمه ورځ هم د سوریې د “حلب” هوایي ډګر ته څېرمه د یاد هېواد څو پوځي مرکزونه اسرائیلي نیواکګرو په نښه کړي و، چې په پایله کې یې ۱۵۰ تنه پوځيان ووژل شول او نږدې ۳۰۰ نور ټپیان شوي وو.
