کابل ټکی کام (جمعه، ۱۷ وری، ۱۴۰۳ل)
ایران یو ځل بیا اسرائیلو خبرداری ورکړی، چې هېڅ برید به یې بې ځوابه پاتې نه شي.
د سوریې په پلازمېنه “دمشق” کې د ایران پر سفارت د اسرائیلو وروستي هوایي، برید چې پکې ګڼ کسان ووژل شول ایران غوصه کړی او بیا بیا یې له اسرائیلو د غچ اخیستلو ژمنه کړې ده.
نن د جمعې تر لمانځه وروسته په پلازمېنه تهران کې د هغو کسانو د جنازې په مراسمو کې د سپاه پاسداران ځواکونو عمومي قوماندان “حسین سلامي” تل أبیب ته خبرداری ورکړ، چې ډېر ژر به د ده په “خبره” د خپلو شهیدانو غچ واخلي.
جنرال سلامي دغه راز د کوم عربي هېواد له نوم اخیستو پرته عربي هېوادونه هم ګواښلي، چې په دمشق کې یې د دوی په سفارت او د سپاه پاسداران ځواکونو په مرکز د حملې کوردینات صهیونیستي ريژیم ته ورکړي دي. نوموړي که څه هم د کوم عربي هېواد نوم نه دی یاد کړی؛ خو په خبره یې ډېر ژر به یې شواهد د نړېوالو مخې ته کیږدي.
له بلې خوا د ایران د دفاع وزیر “محمد رضا آشتیاني” له «المیادین» خبري شبکې سره په مرکه کې ویلي، چې په سوریه کې د ایراني جنرالانو او دیپلوماتانو د وژلو له امله به اسرائیل سخت زیانمن شي.
ایراني رسنیو خبر ورکړی، چې په سوریه کې د وژل شویو کسانو د جنازې په مراسمو کې د حماس اسلامي غورځنګ او اسلامي جهاد مقاومتي ډلو لوړ پوړو مشرانو هم ګډون کړی وو.
د ویلو ده، چې د ایران د سپاه پاسداران لوی درستیز سردار محمد رضا زاهدي هم د هغو کسانو په ډله کې و، چې د تېرې دوشنبې په ورځ په دمشق کې د ایران پر سفارت د اسرائیلي ترهګرو په برید کې ووژل شول.
