کابل ټکی کام (دوشنبه، ۲۰ وری، ۱۴۰۳ل)
د راپورونو له مخې د یمن وسله والو ځواکونو په سره سمندرګي “بحر الأحمر” کې دوه اسرائیلي بېړۍ ویشتلي دي.
د یمن د وسله والو ځواکونو ویاند “جنرال یحیی سریع” پلازمېنه “صنعا” کې یوې خبري ناستې ته د خبرو پر مهال ادعا کړې، چې یادو بېړیو هڅه کوله تېره شپه له سره سمندرګي تېرې شي؛ خو د دوی د وسله والو ځواکونو له لوري د بالستیک توغندیو په وسیله په نښه او په بشپړه توګه ویجاړې شوې دي.
د جنرال یحیی سریع په خبره یادې بېړۍ یې په سوریه، یمن او غزه کې د دوښمنانو د وروستیو بریدونو په غچ کې ویشتلي او یوځل بیا یې خبرداری یې ورکړی، چې د ځواکونو بریدونه به یې تر هغو روان وي، چې له غزې په بشپړه توګه صهیونیستي پوځیان نه وي وتلي، د غزې محاصره یې نه وي ختمه کړې او غزې ته یې د بشري مرستو د لیږلو اجازه نه وي ورکړی.
د ویلو ده، چې د یمن وسله والو ځواکونو د تېر 2023م کال د نومبر میاشتې له نیمایي څخه په سره سمندرګي، عدن خلیج، د هند سمندر او د یمن په سواحلو کې د امریکا، اسرائیلو او برېتانیا په ګډون د ګڼ شمېر هېوادونو بېړیو باندې ۹۹ بریالي عملیات ترسره کړي، چې په پایله کې یې ۸۵ بېړۍ ویشتلي او ۵ نورې یې روغې نیولې دي او د بر خلیک واک یې حماس اسلامي غورځنګ ته ورکړی ده.
