کابل ټکی کام (جمعه، ۲۴ وری، ۱۴۰۳ل)
حماس ویلي هغه څه چې اسرائیلو د شپږو میاشتو راهيسې د روانو بریدونو او نسل وژنې په ترسره کولو سره ندي ترلاسه کړي، پدې باید پوه
شي چې د لا ډیر ځواک او فشار له لارې يې نشي ترلاسه کولی.
د حماس د سیاسي دفتر غړي باسم نعیم د مصر په پلازمینه قاهره کې د اسرائیلو سره د اوربند او د بندیانو د تبادلې په اړه د غیر مستقیمو خبرو اترو په اړه ویلي دي ، چې په قاهره کې د خبرو اترو مهمه برخه د اوربند موافقې ته رسیدل دي، نوموړي زياته کړې”د اوربند سره مونږ کولی شو چې کافي وخت او امنیت پیدا کړو تر څو د اسرائیلي بندیانو په اړه وروستي او دقیق معلومات راټول کړو ځکه چې دوی په مختلفو ځایونو کې ساتل کیږي. د اسرائیلي بندیانو يو شمیر يې زموږ له خلکو سره وژل شوي او تر خاورو لاندې دي.”
هغه دې ته په اشارې سره چې د اسرائیلو خلک اکتوبر د اوومې برید په وړاندوینه کې د ناکامۍ یوازينی مسؤل نتنیاهو بولي. د همدې امله نتنیاهو غواړي چې د جګړې وروسته د ځان د ژغورلو لپاره خپل خلک قرباني کړي.
نعیم دې ته په اشارې سره چې د اکتوبر له اوومې وروسته په غزه کې د اسرائیلو له خوا د نیول شوو لږ تر لږه درې زره فلسطینیانو د توقیف په اړه هیچا پوښتنه نده کړې او اسرائیلو له دغو کسانو څخه یو شمیر یې د خپلو کورنیو په مخکې او ځینې یې په پوځي کمپونو کې اعدام کړي. نعیم وویل، موږ د دې ډول خبرو اترو پایلې غواړو. خو تر ټولو مهمه خبره دا ده چې دا پایلې به تلپاتې ارامتیا تضمین کړي، د غزې له خلکو سره به مرسته وکړي او د بیارغونې لپاره به لاره هواره کړي.
نعيم په دې خبرې سره چې اسرائيلي مذاکره كوونكو “د موقتي اوربند وړانديز كړى”، يادونه وكړه چې د فلسطينيانو لپاره دا ناشونې ده چې په غزه كې د اسرائيلو نوي حضور ومني او اسرائيلو ته د دوى په وړاندې د نوي بريد لپاره مشروعيت وركړي.
د حماس وياند عبداللطيف الکانو په خپل ليکلي بيان کې ويلي چې له اسرائيلو سره موافقې ته رسیدل د بې ځايه شويو فلسطينيانو په شرايطو او له غزې تړانګې څخه د اسرائيلي پوځ په بشپړ وتلو پورې اړه لري.
د مصر، قطر او امریکا په هڅو له څه مودې راهیسې د حماس او اسرائیلو ترمنځ د اوربند او د بندیانو د تبادلې لپاره غیر مستقیمې خبرې روانې دي.
