کابل ټکی کام (شنبه، ۲۵ وری، ۱۴۰۳ل)
په داسې حال کې، چې امریکا پر اسرائیلو د ایران د ځوابي بریدونو په اړه خبرداری ورکړی او ورسره خپلو ځواکونو ته یې په سیمه کې د تیارسئ امر کړی د ترکیې په ګډون ګڼو هېوادونو امریکا ته خبرداری ورکړی، چې پر ایران د برید لپاره د دوس فضایي حریم نشئ کارولی.
د ترکیې ملي رادیو تلویزیون TRT د یاد هېواد د دفاع وزیر په حواله خبر ورکړی، چې هېواد به یې کله هم امریکا ته اجازه ورنکړي، چې پر ایران د احتمالي برید لپاره د دوی له فضایي حریم څخه استفاده وکړي.
په ورته مهال قطر او کویټ هم امریکا ته خبرداری ورکړی، چې پر ایران د برید لپاره امریکا په دې هېوادونو کې له خپلو اډو استفاده نشي کولی.
دا په داسې حال کې ده، چې د امریکا ولسمشر “جوبایډن” په خپلې وینا کې ویلي: ایران به ډېر ژر په اسرائیلو بریدونه وکړي؛ خو موږ د اسرائیلو دفاع ته ژمن یو او اجازه به ورنکړو چې ایران بریالی شي.
د ویلو ده، چې د ایران مذهبي مشر “ایات الله علی خامنه ای” پر اسرائیلو د ځوابي برید په اړه د پارلمان لخوا وړاندې شوې طرحه لاسلیک کړې ده او امریکا ته یې خبرداری ورکړی، چې د دوی او اسرائیلو جګړې څخه دې لرې اوسي کنه په مینځي ختیځ کې به یې په ټولو پوځي اډو مرګوني بریدونه ترسره کړي.
