د صهیونستي رژیم د جنایتونو دوام او د نړيوالو له شرمه ډك درېځ

ابوعثمان غزنوي
له څو میاشتو راهيسې د صهیونستي رژیم ځواكونو له هوا او ځمكې د فلسطين په ځانګړې توګه غزې او رفح پر مظلوم ولس ناتار جوړ كړي، چې لړۍ لااوس هم ډېر په شدت سره دوام لري. د خبري رسنيو د رپوټونو له مخې، د صهیونستي رژیم په دې بشري ضد ناتار كې، تراوسه پورې زره کسان، چې تر نیمايي زیات یې ښځې او ماشومان دي، په شهادت رسېدلي او په زرګونو نور ټپیان شوي دي. دغه انساني تلفات، دومره ژور دی، چې د فلسطين او صهیونستانو تر منځ د لانجې په تېرو پنځوسو كلونو كې یې سارى نه لېدل كېږي. مالي زیانونه خو دومره زیات دی، چې ان میلیاردونو ته ډالرو ته رسېږي؛ د غزې او رفح ټول اقتصادي، روغتیایي او سازماني بنسټونه له منځه تللی دی، د یوې شمېرنې له مخې یوازې په غزه کې ۶۰۰ جوماتونه په بشپړ ډول او ۲۰۰ نور په قسمي توګه د صهیونستي رژیم د وحشت او دهشت د اور خوراک شوی دی.
بل خوا، له میاشتو را په دې خوا، د صهیونیزم ناورین ځپلی غزې ښار د اسراييلي ځواكونو تر كلابندۍ لاندې شپې ورځې تېروي، ويل كېږي، چې همدا اوس په دې ښار كې د جګړه ييز ناورين ترڅنګ، نور ستر ناورينونه لكه د خوراكي توكو كمښت او روغتيايي اسانتياوى نشتوالى، د غزې ښار خلك له سختو ستونزو سره مخ كړي دي.
بايد ووايو، چې نړۍ د بل هر وخت په پرتله نن ډېر سولې او امن ته اړتيا لري. هغه ظلم او وحشت او تروريستي كړنې، چې نن د فلسطين مظلوم ولس په مقابل كې د ټولو نړيوالو نورمونو او منل شويو قوانينو او نورمونو پر خلاف، ترسره كېږي، او په دې اړه د نړيوالو په ځانګړې توګه لويديځ هېوادونه او د ملګرو ملتونو امنيت شورا او بشري حقوقو سازمانونو، چې ځانونه د نړۍ د سولې او امن، انساني حقونو ټيكداران بولي چوپتيا نه يوازې د نړۍ سولې او امن ننګوي، بلكې د نړۍ په ځانګړې توګه د منځنی ختیځ سيمې لړزانده ټيكاو نور هم له سترو كړكېچونو مخامخ كوي.
پر دې بنسټ، كه نړۍ او په ځانګړې توګه ملګرو ملتونو د امنيت شورا سازمان، د نړۍ د روانو حالاتو او اوضاعو په وړاندې په رښتيني توګه بې پرې درېځ لري او ځان د نړۍ د امن او سولې څارګر او ساتونكى بولي، نو دې د انساني غمېزو په وړاندې دې توپير نه كوي او بايد زره تر زره د فلسطيني ولس پر وړاندې د اسراييلي ځواكونو د ناروا بريدونو او پوځي عملياتونو مخه ونيسي او په دې اړه كوټلي او پرېكنده ګامونه واخلي. له دې پرته كه د غزې پر خلكو د اسراييلي پوځونو عمليات همداسې روان وي او نړيوالو يې د تېر په شان په پټه خوله ننداره وكړي، د دې ترڅنګ، چې په سيمه كې به يوه ستره انساني فاجعه رامنځ ته شي، د سيمې او نړۍ د ثبات ترینګلي حالت ته په پام سره، د تاوتريخوالي او كړكيچونو نوي څپي رادبره او د خطرناك توپان په څېر هر څه له ځانه سره راواخلي، چې هغه مهال، بيا د اوضاعو د راقابو كولو په موخه هڅې او د بشري امن او حقوقو ډنډورې د يوې بې ځايه، بې وخته او پوڅ شعار په توګه، چې يوازې د زورواكو او نېواكګرو قدرتونو ګټې او موخې خوندي كوي، بل انځور ونه لري.