کابل ټکی کام (چهارشنبه، ۲۳ غبرګولی، ۱۴۰۳ل)
د عراق د اسلامي مقاومت “حشدالشعبي” ځواکونو د اشغال شوي فلسطین په شمالي ښار “حیفا” کې د صهیونیستي ريژیم مهم پوځي اهداف په نښه کړي دې. یادې ډلې د یوې خبر پاڼې په خپرولو سره ادعا کړې، چې ځواکونو یې تېره ورځ د اشغالي فلسطین په “حیفا” بندري ښار د بالستیک توغندیو او بې پیلوټه الوتکو بریدونه کړي، چې په پایله کې یې د صهیونیستي ريژیم یوه پوځي اډه، د تیلو ذخیرې او د ډرون الوتکو یوه کارخونه ویجاړ شوي دي. که څه هم صهیونیستي ريژیم تر اوسه د عراق د اسلامي مقاومت وسله والې ډلې د ادعاوو په هکله څه نه دي ویلي؛ خو دا لومړی ځل نه دی، چې د عراق د اسلامي مقاومت ځواکونه پر اسرئیلو بریدونه کوي، بلکې یادې ډلې د حماس او اسرائیلو ترمنځ د جګړې له پیل راهیسي په اسرائیلو او سیمه کې د امریکا او برېتانیا په پوځي اډو سلګونه بریالي عملیات ترسره کړي دي.
