کابل ټکی کام (شنبه، ۲ چنګاښ، ۱۴۰۳ل)
د لبنان د اسلامي مقاومت غورځنګ حزب الله ته نږدې سرچینو “المنار” تلویزیوني شبکې ته د خپل هغه نښان ویشتونکي د وژل کېدو پخلی کړی، چې په تېرو ۷ میاشتو کې یې د لبنان- اسرائیلو پر پوله نږدې ۵۰ اسرائیلي پوځیان وژلي وو. د حزب الله غورځنګ سرچینو که څه هم د خپل دغه جنګیالي د هویت په هکله د ډېرو جزئیاتو له ورکولو ډډه کړې ده؛ خو په خبره یې نوموړی نن شنبه د جون په ۲۲ مه نېټه د لبنان په جنوب کې د صهیونیستي اشغالګرو په هوایي برید کې وژل شوی ده. د یادونې وړ ده، چې دا لومړی ځل نه دی، چې صهیونیستي ريژیم د حزب الله غورځنګ مهم کسان په نښه کوي، بلکې تر دې وړاندې یې هم د یاد غورځنګ لسګونه مهم قوماندانان وژلي دي.
