کابل ټکی کام (یکشنبه، ۱۰ چنګاښ، ۱۴۰۳ل)
د دوحې له ناستې وړاندې د “ذبیح الله مجاهد” په مشرۍ د اسلامي امارت پلاوي د بيلابيلو هېوادونو له استازو سره کتلي دي. لومړۍ کتنه د ازبکستان د جمهور رئیس دخاص استازي “عصمت الله ارګاشف” سره شوې او په دې لیدنه کې د دواړو هېوادونو په اړوندو موضوعاتو د نظر تبادله وشوه، ازبکستان او افغانستان ګڼې تجارتي او اقتصادي پروژې سره لري او ازبیکستان د دوحې په ناسته کې د اسلامي امارت له دریځ څخه حمایت څرګند وکړ. دویمه لیدنه نن غرمه د روسې د جمهور رئیس ځانګړي استازي ښاغلي “ضمیر کابلوف” سره شوې د افغانستان او روسې هېواد د اړیکو په پیاوړتیا پکې خبرې شوې دي.روسیې هم د افغانستان اسلامي امارت له دریځ څخه حمایت وکړ او اسلامي امارت هم د روسیې له مثبت دریځ څخه مننه وکړه. دریمه کتنه نن غرمه د افغانستان، پاکستان او ایران لپاره د هند هېواد له استازي “جي پی سنگھ” سره شوې، د دواړو هېوادونو د اړیکو د پیاوړتیا په اړه پکې بحث وشو.
هندوستان هم د دوحې په راتلونکې ناسته کې د افغانستان له دریځ څخه حمایت وکړ. او افغان پلاوي له افغانستان سره د هند له مرستو څخه مننه وکړه.
