کابل ټکی کام (چهارشنبه، ۱۳ چنګاښ، ۱۴۰۳ل)
د اسرائیلي پوځ رادیو خبر ورکړی، چې د غزې تړانګې په شمال او جنوبي “رفح” ښار کې یې حماس ځواکونو سره نښتو کې درې تنه پوځیان وژل شوي او ګڼ نور ټپیان شوي دي. د اسرائیلو پوځ وایي ځواکونو ته یې وړمه ورځ هغه مهال مرګ ژوبله واوښته، چې د غزې تړانګې شمال کې یې ټانک د حماس ځواکونو لخوا په نښه شو او په پایله کې یې دوه پوځیان ووژل شول او ۷ تنه نور ټپیان شول. اسرائیلي پوځ دغه راز خبر ورکړی، چې د غزې تړانګې په جنوبي رفح ښار کې یې هم یو پوځي وژل شوی او درې نور ټپیان شوي دي. د اسرائیلي پوځ په خبره ټپیان یې روغتون ته رسولي؛ خو د ځینو حالت یې د اندېښنې وړ ښودل شوی دی. په ورته مهال د حماس اسلامي غورځنګ د پوځي څانګې “القسام” لېوا سرچینو “الأقصی” تلویزیوني شبکې ته ویلي، چې په رفح او د غزې تړانګې په شمال کې یې ۸ صهیونیستي پوځیان وژلي او ګڼ شمېر نور یې ټپیان کړي دي. د یادونې وړ ده، چې د اسرائیلو ۱۲ خبري آژانس بیا د وژل شویو اسرائیلي پوځیانو شمېر ۵ او د ټپیانو ۱۶ تنه ښودلی ده.
