کابل ټکی کام (شنبه، ۱۷ وږی، ۱۴۰۳ل)
د حماس اسلامي غورځنګ د پوځي څانګې “القسام لېوا” ویاند ابوعبیده الأقصی تلویزیوني شبکې سره په خپلو تازه خبرو کې ویلي، چې په تېرو سلو ساعتونو کې یې د صهیونیستي پوځ ۱۴ ټانکونه په بشپړ ډول له مینځه وړي دي، چې په پایله کې یې لسګونو اشغالګرو پوځيانو ته مرګ ژوبله اوښتې ده.
د نوموړي په خبره د ځواکونو عملیات یې په بریالیتوب مخ پر وړاندې روان دي او د غزې په ډېرو سیمو کې یې صهیونیستي اشغالګر شاتګ ته اړ کړي دي.
دا په داسې حال کې ده، چې اسراییلي رسنیو هم خپلو ځواکونو ته د پراخې مرګ ژوبلې د ور اوښتو پخلی کړی او په خبره یې د اکتوبر له اومې نېټې راهیسې یې حماس او نورو فلسطیني مقاومتي ډلو سره په روانو جګړو کې تر پنځو زرو زیاتو سرتېرو ته مرګ ژوبله اوښتې ده.
د کتوونکو په باور د غزې په شمال کې د اسراییلي نیواکګرو پر وړاندې د حماس او نورو فلسطیني جهادي ډلو مقاومت بی ساری ده او اسراییلي ځواکونو ته د اوښتې مرګ ژوبلې له امله د اسراییلو دننه هم د پوځ او نتنیاهو ترمنځ اختلافات ورځ تر بلې په ډیرېدو دي او په تل ابیب کې د اسراییلي وګړو لخوا هم د جګړې ضد روحیه په لوړېدو ده او د هرې ورځې په تیرېدو سره د نتنیاهو د حکومت پر وړاندې لاریونونه زور اخلي.
