کابل ټکی کام (دوشنبه، ۲۶ وږی، ۱۴۰۳ل)
د یمني ځواکونو د رسنیو د دفتر مشر “نصرالدین عامر” کابل ټکي کام ویب پاڼې ته په رالیږلي پیغام کې ویلي، چې د فلسطیني مقاومتي غورځنګ مشر “یحیی سنوار” د حوثیانو بنسټګر او روحاني مشر “سید بدرالدین عبدالمالک الحوثي” ته په یوه لیږلي پیغام کې په صهیونیستي ریژیم د یمن د وسله والو ځواکونو د وروستي برید هرکلی کړی دی.
یحیی سنوار حوثي ته ویلي: په صهیونیستانو مو وروستی برید کاري و او زه د فلسطیني ولس په استازیتوب درته مبارکي وایم.
یحیی سنوار دغه راز ویلي، چې په صهیونیستي پلازمېنه تل ابیب کې د یمني ځواکونو د بالستیک توغندي لګیدلو وښوده، چې د صهیونیستانو دفاعي سیستمونه کمزوري او حتی له کاره لویدلي دي.
د یادونې وړ ده، چې د یمن د وسله والو ځواکونو د رسنیو د دفتر مشر نصرالدین عامر په خپله ایکس پاڼه د عبدالمالک حوثي له اړخه یحیی سنوار ته په ځواب کې ویلي، چې د یمن وسله وال ځواکونه به تر پایه له فلسطیني ولس سره ولاړ وي او د صهیونیستانو پر وړاندې به خپلو عملیاتو ته دوام ورکوي.
