کابل ټکی کام (سه شنبه، ۲۷ وږی، ۱۴۰۳ل)
د حماس اسلامي غورځنګ د دفتر مشر یحیي سنوار ویلي، چې په سیمه کې د خپلو متحدینو په ملاتړ د صهیونیستي ريژیم پر ضد جګړه د اوږدې مودې لپاره روانه ساتلی شي.
نوموړی،چې تیره میاشت د حماس د اسلامي غورځنګ د پخواني سیاسي مشر اسماعیل هنیه تر شهادت وروسته د هغه ځای ناستی وټاکل شو، په یمن کې د حوثیانو بنسټګر مشر “عبدالمالک بدرالدین الحوثي” ته په یو لیک کې لیکلي چې په غزې کې د اسرائیل پر ضد اوږدې جګړې ته یې ځان چمتو کړی.
د حماس سیاسي مشر دا څرګندونې داسې مهال کړي چې په غزې کې څه باندې ۱۱ میاشتې کیږي چې د صهیونیستي ترهګر ريژیم او فلسطیني مقاومتي ډلو تر منځ خونړۍ جګړې کې شاوخوا ۴۰ زره کسان شهیدان شوي، چې د غزې عامې روغتیا وزارت معلوماتو له مخې ډیر یې میرمنې او ماشومان دي.
ښاغلي سنوار په دې لیک کې پرته له دې چې د اسرائیلو یا بل کوم هیواد نوم یاد کړي، ګواښ کړی چې په غزې او سیمې کې صهیونیستي ضد ډلې به د “دښمن سیاسي اراده ماته کړي”.
هغه په یمن کې د انصارالله او په لبنان کې د حزب الله ډلې ته په اشارې سره په دې لیک کې لیکلي، “تاسو سره زمونږ ګډې هڅې به صهیونیستي دوښمن له شرمونکې ماتې سره مخ کړي.
د یادونې وړ ده، چې دا لومړی ځل دی، چې یحیی سنوار د حماس غورځنګ د سیاسي دفتر د مشر په توګه د یمني حوثیانو رهبر ته پیغام لیږي یادې ډلې ویلي، چې ډېر ژر به د یحیی سنوار یو هر اړخیز پیغام هم نشر ته وسپارل شي.
