کابل تکی کام (پنجشنبه، ۳۰ کب، ۱۴۰۳ل)
د افغانستان د بهرنيو چارو وزارت د خبرپاڼې له مخې، د بهرنيو چارو وزير مولوي امير خان متقي نن د بنديانو په چارو کې د امريکا متحده ايالاتو د ولسمشر ځانګړي استازي او ورسره د افغانستان لپاره د امریکا پخواني ځانګړي استازي ښاغلي زلمي خليلزاد او ملپلاوي په کتنه کې په دوه اړخيزو اړيکو او نورو مهمو موضوګاتو خبرې کړي دي.
د بهرنيو چارو وزارت خبرپاڼه کې راغلي، په دې ناسته کې د افغانستان او امریکا پر دوو اړخيزو اړيکو، د بنديانو په خلاصون او په امريکا کې افغانانو ته د کونسلي خدماتو وړاندې کولو په اړه خبرې شوي دي.
ښاغلي متقي کابل ته د ياد پلاوي راتګ د دوو اړخيزو اړيکو کې ښه پرمختگ بللی او يوځل بيا يې ټينګار کړی چې اسلامي امارت د خپل متوازن بهرني سياست په رڼا کې ټولو لوريو سره مثبتې اړيکې غواړي زياتوي:«دا مهمه ده چې افغانستان او امریکا پر دې وتوانېږي چې مسئلې د خبرو له لارې اوارې کړي، پکار ده چې دواړه هېوادونه د شل کلنې جگړې له اغېزو راووځي او يو بل سره سياسي او اقتصادي مثبتې اړيکې ولري».
بل پلو ته د بنديانو په چارو کې د امريکا د ولسمشر ځانګړي استازي اډم بوايلر ويلي چې د افغانستان او امريکا ترمنځ د بنديانو په برخه کې پرمختگ د باورجوړونې پر لور ښه گام دی او په افغانستان کې يې د مخدره موادو پرخلاف او د امنيت د ټينگښت پر لور اقدامات د ستاينې وړ بللي دي.
نوموړي د دواړو خواوو له لوري د خبرو پر دوام ټينګار کړی او زياته کړې ده چې د دواړو هېوادونو تر منځ په ځينو پړاونو کې ستونزې وې خو دا چې دواړوه هېوادونه تاريخي اړيکي لري نو مهمه دا ده چې راتلونکي ته وکتل شي.
