کابل ټکی کام (جمعه، ۲۹وری، ۱۴۰۴ل)
د فلسطین د اسلامي مقاومت حرکت «حماس» لوړ پوړي چارواکي خليل الحيا ويلي، چې حماس د دې لپاره چمتو شوی دی، چې سمدلاسه د یو هراړخيز تړون د جوړېدو لپاره مذاکرات وکړي.
حماس د لنډ مهالي اوربند وړانديز رد کړی او خليل حيا ويلي، چې حماس به په دې شرط ټول اسرائيلي بنديان خوشي کړي چې اسرائيلي ځواکونه تلپاتې اوربند ترسره کړي او له غزې څخه ووځي:«موږ د بندیانو د تبادلې، د غزې له تړانګې څخه د اشغال د بشپړ وتلو، د بیارغونې د پیل کولو او د محاصرې د لرې کولو په بدل کې د یوې جامع معاملې پای ته رسولو ته چمتو یو»
خليل الحيا ويلي، چې په دې هراړخيز تړون کې به دا راشي، چې حماس به ټول اسرائيلي بنديان خوشي کړي، په عين وخت کې به اسرائيلي لوري هم يو شمېر فلسطيني بنديان خوشي کړي، په دې سره اسرائيلي ځواکونه د غزې پر خلکو بريدونه په بشپړه توګه پای ته ورسوي، له غزې څخه په بشپړه توګه ووځي او د غزې تړانګې د بيا رغونې چارې به پيل کړي.
نوموړي ویلي، چې اوس د اسرائیل صدراعظم نېتانياهو او حکومت يې په یو اړخیز ډول د غزې جنګ ته دوام ورکوي.
