سرچینه: المشهد الیمني الأول
د روسیې «تسارګراد» ورځپاڼې یو تحلیلي راپور خپور کړی، چې لیکوال یې روسی تحلیلګر «الکساندر ارتامونوف» دی. په دې راپور کې هغه د هغو پرلپسې ضربو یادونه کړې چې متحده ایالاتو ته په یمن کې ورکړل شوي؛ د څلورو MQ-9 Reaper بېپیلوټه امریکایي الوتکو نسکورول، په لږو تر دوه اونیو کې، چې دا یې نه یوازې نظامي، بلکې سمبولیک او ستراتیژیک ټکان بللی دی.
ارتامونوف څرګنده کړې، چې د دغو الوتکو بیه نږدې ۳۰ میلیونه ډالره ده او دا د امریکا د هوايي برلاسي مهم اساسات ګڼل کېږي، په ځانګړي ډول د منځني ختیځ په سیمه کې. دا الوتکې د جاسوسۍ، هدف ویشتلو، او پرمختللي برید او څار توان لري، چې تر ۱۴ ساعته پورې پرته له ځمکې ته کښته کېدو الوتنه کولی شي، او تر ۱۴ هیلفایر توغندیو پورې بارولی شي.
خو د لیکوال په وینا، دا ټول امکانات هم د دې مخه ونه نیوله، چې الوتکې د یمني دفاعي سیستم له لوري پرلپسې نسکورې شي. دا پرمختګ ښيي، چې د «انصارالله» تخنیکي او انجنیري وړتیاوې خورا پرمختلي دي، چې له کلونو راهیسې پرې پټه توګه کار روان دی.
لیکوال دا وضعیت د “امریکايي هوايي برلاسي د حیثیت سقوط” بللی، او ویلي یې دي چې یمنیان یوازې الوتکې نه غورځوي، بلکې د هغې نظامي عقیدې پر ضد عمل کوي، چې امریکایان یې نه ماتېدونکې ګڼله. هغه ټینګار کړی چې دا لاسته راوړنې یوازې د یمن کار نه دی، بلکې تر شا یې سیمهییز ملاتړ، نوښتګر تخنیکي وړتیا، او د داخلي دفاعي سیستمونو پرمختللي بدلونونه ولاړ دي.
راپور زیاتوي چې د MQ-9 الوتکو د دې شمېر له مخې له منځه وړل یوازې مالي زیان نه دی، بلکې دا د امریکا سیاسي او نظامي وړتیا ته هم ټکان ورکړی، او دا اوس د لویدیځو پوځي مرکزونو، په ځانګړي ډول پنټاګون، کې د اندېښنې لامل ګرځېدلې ده.
په پای کې لیکوال ویلي، چې که د امریکايي الوتکو سقوط دوام ومومي، په ځانګړې توګه د یمن شمال لویدیځ کې، دا به یو خطرناک هوايي بدلون وي، چې د هوايي جګړو قواعد به بیا تعریف کړي. او دا چې د صنعا فضا اوس «امریکایي الوتکو ته بنده سیمه» ګرځېدلې، هره نسکوره شوې الوتکه د نوي سرې کرښې نښه ده، چې د مخنیوي نقشه بدلوي.
