کابل ټکی کام (يکشنبه، ۳۱ وری، ۱۴۰۴ل)
په غزه کې حرکت مقاومت اسلامي د القسام څانګې اعلان کړی چې د دوی مجاهدينو د بيت حانون ختيځ لور ته د اسرائيلي ځواکونو پر ضد پراخ بريدونه ترسره کړي دي.
د القسام په وينا، دوی پرون د “تورې ماتولو” په نوم يو ګډ کمين ترسره کړی، چې له مخې يې د اسرائيلي پوځ د جګړهيي معلوماتو د راټولولو قطعې يو ټانګ د زغروال ضد توغندي په وسیله په نښه کړ. سرچينې زياتوي چې د برید پر مهال، د مرستې لپاره را رسېدلو ځواکونو ته هم ماين ايښودل شوی و، چې په ترڅ کې يې پر هغوی د افرادو ضد چاودېدونکی ماين وچاودېد چې په ترڅ کې يې د دښمن سرتيرو ته درنه مرګ ژوبله واوښته.
همداراز القسام اعلان کړی، چې د دښمن پر يو تازه جوړ شوي نظامي مرکز باندې يې د څلورو آر پي جي توغندیو برید کړی او وروسته يې پرې د هاوان مرمۍ وورولي په دې بريد کې هم اسراییلي اشغالګرو عسکرو ته تلفات اوښتي دي.
دغه راز په يوه بل بريد کې، د القسام جنګیالي د بيت حانون له یوه تونل څخه راوتلي او پر یوه اسرائيلي ټانګ یې د زغروال ضد توغندي برید کړی، چې له امله يې درې ښځينه سرتېري ټپیانې شوي دي. کله چې د اسرائيلي ځواکونو یوه بله ډله د مرستې لپاره سيمې ته رسېدلې، نو پر هغوی بله چاودنه شوې، چې يو عسکر پکې وژل شوی او دوه نور سخت ټپیان شوي دي.
پوځي شنونکي، لکه جنرال الدویري، دا پېښې د غزې د جګړې مهم پرمختګ بولي او وايي چې د القسام تاکتيکونه د اسرائيلي ځواکونو پر عملياتو جدي اغېز لري.
