کابل ټکی کام (يکشنبه، ۷ غویی، ۱۴۰۴ل)
د افغانستان اسلامي امارت د بهرنيو چارو وزير مولوي اميرخان متقي د ملګرو ملتونو د سرمنشي له مرستيال او د بشري مرستو د همغږۍ ادارې (اوچا) له عمومي رئيس ښاغلي ټام فليچر سره په کابل کې کتلي دي.
د بهرنيو چارو وزارت په خبرپاڼه کې راغلي ، چې په دې کتنه کې دواړو خواوو د ګاونډيو هېوادونو څخه د راستنېدونکو افغانانو، د اقليمي بدلون د ناوړو اغېزو، طبيعي آفتونو پر وړاندې د چمتووالي، له مخدره موادو سره د مبارزې، کروندګرو ته د بديل معيشت برابرولو، او د بشري مرستو د بڼې له بدلون څخه تر پرمختيايي پروژو پورې پر مهمو موضوعاتو خبرې کړي دي.
د بهرنيو چارو وزير ښاغلي متقي د خبرو پر مهال ويلي، چې افغانستان له اوږدو جګړو، بې امنۍ او مخدره موادو سره د تړلو ستونزو څخه د خلاصون په حال کې دی، او اسلامي امارت هوډ لري چې هېواد د خپلو داخلي ظرفيتونو پر بنسټ پر خپلو پښو ودروي. نوموړي ټينګار کړی، چې که څه هم دا بهير وخت ته اړتيا لري، خو لا هم د بهرنيو مرستو دوام ضروري دی او غوښتنه يې کړې:«مرستې بايد د افغانستان د خلکو له واقعي اړتياوو او لومړيتوبونو سره سمې عيارې شي، ترڅو د داخلي بازار پياوړتيا، اقتصادي وده او دوامداره پرمختګ تضمين کړي.»
د بهرنيو چارو وزارت د خبرپاڼې له مخې، ټام فليچر ويلي چې ملګري ملتونه د افغانستان له حکومت سره د امنيت، ثبات، اقليمي بدلون او له مخدره موادو سره د مبارزې په برخو کې ګډ کار ته ژمن دي.
ده زياته کړه چې له دې وروسته به د مرستو د تطبيق اصلي پرېکړه کوونکي افغانان وي او د مرستو ډول به له بشري مرستو څخه پرمختيايي پروژو ته واوړي.
په پای کې، دواړو خواوو د لا زياتې همغږۍ، مؤثريت او مثمريت لپاره د ګډ کار ژمنه کړې او د افغانستان د خلکو د لومړيتوبونو په رڼا کې د مرستو د بهير د تنظيم پر اړتيا يې ټينګار کړی.
