کابل ټکی کام (دوشنبه، ۸ غویی، ۱۴۰۴ل)
د کلیو د بیارغونې او پراختیا وزارت سرپرست وزیر ښاغلي ملا محمد یونس اخندزاده د افغانستان لپاره د ملګرو ملتونو د سرمنشي له ځانګړې استازې او د یوناما له مشرې میرمن روزا اوتونبایوا سره کتلي دي.
د کلیو د بیارغونې او پراختیا وزارت وايي، په دې ليدنه کې میرمن اوتونبایوا د یوناما د مرستو پر دوام ټینګار وکړ او ویې ویل چې دوی به د راستانه شوو کډوالو لپاره د پاکو اوبو، روغتیا ساتنې او نورو بشري برخو کې خپلې مرستې پراخې کړي.
د کلیو د بیارغونې وزیر د یوناما له دوامدارو همکاریو مننه وکړه او زیاته یې کړه چې د راستانه شوو کډوالو لپاره به ډېر ژر د پاکو اوبو رسولو شبکې جوړې شي. هغه د یوناما له استازو وغوښتل چې د بشري مرستو تر څنګ بنسټیزو او عام المنفعه پروژو ته هم پاملرنه وکړي او خپلې چارې د وزارت په همغږۍ ترسره کړي.
په پای کې دواړو لوریو د خپلو همکاریو د لا پراخېدو ژمنه وکړه.
