کابل ټکی کام (دوشنبه، ۱۵ غویی، ۱۴۰۴ل)
د کابل ښار د امنیه قوماندانۍ د نشهيي توکو پر وړاندې د مبارزې پولیسو د ښار په لسمه امنیتي حوزه کې د شرابو یوه فابریکه کشف او له منځه وړې ده.
د نشهيي توکو سره د مبارزې مدیر مولوي عبدالباري محمدي وايي، له فابریکې څخه ۴۹ لیټره شراب او د شرابو جوړېدو لپاره ۱۱ بوشکې تخمیر شوي کشمش هم ترلاسه شوي دي.
د ښاغلي محمدي په وينا، چې پوليسو په دې تړاو د درېيو ښځو په ګډون شپږ کسان نيولي دي زیاتوي چې نیول شويو کسانو له لومړنیو تحقیقاتو وروسته په خپل جرم اعتراف کړی دی.
د کورنیو چارو وزارت د چارواکو په وینا، په تېرو څلورو کلونو کې د نشهيي توکو پر ضد پراخه مبارزه شوې او د مخدره موادو له تولید، قاچاق او استعمال سره قانوني چلند شوی دی.
