کابل ټکی کام (دوشنبه، ۲۲ غویی، ۱۴۰۴ل)
د فلسطین اسلامي غورځنګ حماس اعلان کړی، چې له امریکا متحده ایالاتو سره یې په مستقیمو مذاکراتو پیل کړی څو په غزه کې اوربند ته لاره هواره شي.
دغه پرمختګ په داسې حال کې رامنځته شوی، چې یادې ډلې د يو امريکايي تابعيت لرونکي اسراييلي سرتېري د خوشې کولو پرېکړه هم کړې ده.
د حماس ویاند پرون (یکشنبه، د غويي ۲۱مه / می ۱۱مه) وویل، چې د اسرائیلي پوځی عيدان الکساندر چې امريکايي تابعيت هم لري، خوشې کول به د اوربند د هڅو يوه برخه وي. ټاکل شوې چې دغه بندي به د ۴۸ ساعتونو په ترڅ کې آزاد شي.
د حماس د سیاسي دفتر لوړپوړي غړي او د مذاکراتي پلاوي مشر خلیل الحیة وويل، چې دا اقدام د قطر، مصر او ترکیې په منځګړيتوب، او له امريکايي چارواکو سره د وروستیو تماسونو په چوکاټ کې ترسره کېږي زياته يې کړه:«موږ چمتو یو چې سمدستي او جدي مذاکرات پيل کړو، څو يوه نهايي هوکړه وشي، د جګړې اور مړ شي، او د اسیرانو تبادله د متفقې طرحې له مخې عملي شي.»
حماس وايي، د اوربند ترڅنګ غواړي چې د غزې اداره يوې بې طرفې مسلکي ادارې ته وسپاري، ترڅو سيمه کې د تلپاتې ثبات، بيا رغونې او د کلابندۍ پای ته رسېدو ته لاره هواره شي.
د امريکا پخواني ولسمشر ډونالډ ټرمپ د ياد سرتېري د خوشې کولو پرېکړه «د حسن نيت څرګندونه» بللې او هيله يې ښودلې، چې دا ګام به د دې خونړي کړکېچ د پای ته رسېدو لپاره يو مهم پيل وي.
بل لور ته د یو بل بندي «متان» مور عيناف تسنغاوکر د اسراييلي حکومت په مشر بنيامين نتنياهو سختې نیوکې کړي او ويلي یې دي، چې زوی یې له عيدان سره په يوه ځای کې بندي دی، خو یوازې عيدان خوشې کېږي، ځکه چې نتنياهو يې د زوی د وژنې پرېکړه کړې ده.
دا په داسې حال کې ده، چې د اسراييلي محاصرې له امله په غزه کې بشري ناورين ورځ تر بلې پراخېږي.
نړیوالو مرستندویه ادارو خبرداری ورکړی چې د خوراکي توکو او درملو زېرمې یې ختمې شوي، او زیاتره ټولنیزې ادارې، لکه نانوایان او د عامه پخلنځیو مرکزونه، تړل شوي دي.
