کابل ټکی کام (دوشنبه، ۲۲ غویی، ۱۴۰۴ل)
د اسرائیلو صدراعظم بنیامین نتنیاهو د کورنیو او بهرنیو پالیسیو له امله له پراخو نیوکو سره مخ شوی دی، چې له کبله یې ګڼ شمېر خلکو هغه ته د “هېواد ستر دښمن” لقب ورکړی دی.
د نتنیاهو د حکومت لخوا د قضايي نظام د اصلاحاتو هڅې، چې د عدلي واکونو محدودول پکې شامل دي، د اسرائیلو په ګڼو ښارونو کې د پراخو مظاهرو سبب شوې دي. معترضان ادعا کوي چې نوموړی د دیموکراسۍ بنسټونه کمزوري کوي او د خپلې سیاسي بقا لپاره دولتي ادارې تر فشار لاندې راولي.
همداراز، د فلسطینیانو سره د شخړو پر وړاندې د نتنیاهو سخت دریځ، د غزې په تړانګه کې پوځي عملیات، او د سولې پروسې ځنډ هم د هغه پر ضد د ولس احساساتو د زیاتېدو لامل شوي دي.
سیاسي شنونکي وايي چې دا لومړی ځل دی چې یو منتخب مشر د خپل ولس له خوا د “دښمن” په توګه یادېږي، او دا ښيي چې د هېواد دننه بې باوري تر خطرناک حده رسېدلې ده.
