کابل ټکی کام (پنجشنبه، ۲۵غویی، ۱۴۰۴ل)
د کورنيو چارو وزارت وايي چې د کابل ولايت د ده سبز ولسوالۍ پوليسو نږدې پنځه ټنه قاچاقي لاجورد نیولي دي.
د وزارت د معلوماتو له مخې، دا لاجورد چې ټولټال ۴۸۰۵ کيلوګرامه وزن يې درلود، په یوه ۳۰۴ ډوله بس کې له بدخشان ولايت څخه کابل ته قاچاق کېده.
پوليسو دغه محموله د ده سبز ولسوالۍ د بختيارانو په نوم سيمه کې کشف او ضبط کړه.
کورنيو چارو وزارت وايي، له يادو لاجوردو سره يو کس هم نيول شوی او د نوموړي دوسيه د نورو څېړنو لپاره د جنايي څېړنو رياست ته لېږدول شوې ده.
د کورنيو چارو وزارت زياتوي چې د دې ډول غيرقانوني انتقالاتو پر وړاندې يې هڅې دوام لري.
