کابل ټکی کام (دوشنبه، ۱۹ غبرګولی، ۱۴۰۴ل)
د اسلامي نړۍ تر ټولو ستر دیني-سیاسي تحریک، اخوان المسلمین، د غزې د روانې جګړې په اړه تازه څرګندونې کړي او د حماس اسلامي مقاومت غورځنګ یې د دې جګړې بریالی اړخ بللی دی.
په یوه تازه اعلامیه کې چې د اخوان المسلمین رسمي ویاند خپره کړې، راغلي دي:
“حماس د فلسطین د آزادۍ سنګر دی. د غزې مجاهدین د ټول امت عزت، کرامت او آزادۍ لپاره جګړه کوي، او دوی په نظامي، سیاسي او اخلاقي ډګرونو کې د صهیونیزم پر وړاندې سترې بریا ته رسېدلي دي.”
اعلامیه زیاتوي چې د اسرایيلو پوځ، چې ځان د نړۍ تر ټولو پرمختللی نظامي ځواک بولي، د غزې د کوچني مقاومت په وړاندې ناکام شوی دی. اخوان المسلمین دا هم ویلي، چې د صهیونیستي رژیم له خوا د ملکي خلکو، ښځو او ماشومانو قتل عام، نه یوازې یو جنایت دی، بلکې د هغوی ستره ناکامي هم ده.
په اعلامیه کې راغلي:
> “د حماس غښتلې مشرتابه، د ولسي ملاتړ دوام، او د شهیدانو اراده، دا ټول هغه فکتورونه دي چې د اسرایلي اشغال پر وړاندې یې د مقاومت معادله بدله کړې ده.”
اخوان المسلمین له ټولو اسلامي هیوادونو، علماوو، او ولسونو غوښتي چې د حماس او فلسطیني مقاومت هر اړخیز ملاتړ ته دوام ورکړي او د اشغالګرو پر ضد د سیاسي او اقتصادي فشارونو لپاره غږ پورته کړي.
د اعلامیې په پای کې ټینګار شوی:
> “دا جګړه یوازې د حماس نه، بلکې د ټول امت جګړه ده. بریا د ایمان، استقامت، او د الله په نصرت ده، او دا نصرت به انشاءالله د حماس له لارې تحقق ومومي.”
د ویلو ده، چې اخوان المسلمین دا څرګندونې په داسې حال کې کوي، چې د ۲۰۲۳م کال د اکتوبر له اوومې نیټې راپدېخوا، د غزې جګړه روانه ده، چې له امله یې زرګونه فلسطینیان شهیدان شوي، خو بیا هم د مقاومت پیاوړي دي.
