کابل ټکی کام (دوشنبه، ۲ چنګاښ، ۱۴۰۴ل)
د ایران د هوايي دفاع قرارګاه اعلان کړی چې تېرو ۲۴ ساعتونو کې یې د صهیونیستي رژیم ۱۳۰ بېپیلوټه الوتکې له منځه وړي دي.
د تسنیم خبري آژانس د راپور له مخې، د ایران هوايي دفاعي ځواکونو په خپره کړې خبرپاڼه کې ویلي چې له تېرو ورځو راهیسې د صهیونیستي رژیم له لوري پر ایران د توغول شوو جاسوسي، جګړهییزو او ځانمرګو بېپیلوټه الوتکو لکه هرمز، هرون او هاروپ بریدونه ترسره شوي، چې د ایران دفاعي ځواکونو ورسره بریالۍ مقابله کړې ده.
په خبرپاڼه کې راغلي:
> “د تهران په ګډون ګڼو ښارونو کې د اشغالګر رژیم ۱۳۰ جاسوسي او بریدګرې بېپیلوټه الوتکې له منځه وړل شوي دي، چې پکې د دښمن تر ټولو پرمختللي ډرونونه لکه هرمز ۹۰۰، هرمز ۹۴۵ او هرون هم شامل دي.”
خبرپاڼه زیاتوي چې دغه الوتکې په بېلابېلو سیمو کې را نسکورې شوې او انځورونه یې د ایران له ملي تلویزیونه خپاره شوي دي.
دغه پرمختګ داسې مهال رامنځته کېږي، چې د ایران او اسرائیلو ترمنځ کړکېچ تر ټولو لوړې کچې ته رسېدلی او دواړو لورو بر یو او بل پراخ هوايي عملیات کړي دي.
