نظرپوښتنه: د ولسمشر ټرمپ محبوبیت تر ټولو ټیټې کچې ته راښکته شوی

کابل ټکی کام (پنجشنبه، ۱۰ غویی، ۱۴۰۵ل)
د رویټرز خبري آژانس د یوې نوې نظرپوښتنې له مخې، د امریکا د ولسمشر ټرمپ محبوبیت د هغه د اوسني ولسمشرۍ پړاو تر ټولو ټیټې کچې ته رسېدلی دی.
رویټرز راپور ورکړی چې دغه نظرپوښتنه، چې د سه‌شنبې په ورځ خپره شوې، ښيي یوازې ۳۴ سلنه امریکایان په سپینه ماڼۍ کې د ټرمپ له کړنو ملاتړ کوي. دا په داسې حال کې ده چې د همدې بنسټ په مخکینۍ سروې کې، چې د اپرېل له ۱۵ تر ۲۰ ترسره شوې وه، د هغه محبوبیت ۳۶ سلنه ښودل شوی و.
د راپور له مخې، د ټرمپ دریځ د ۲۰۲۵م کال د جنورۍ له پیل راهیسې، هغه وخت چې ۴۷ سلنه امریکایانو ورته رایه ورکړې وه، په پرله‌پسې ډول راټیټ شوی دی.
شنونکي وایي، د بیو لوړوالی او اقتصادي فشارونه پر امریکايي کورنیو دروند اغېز کړی، چې له امله یې د ټرمپ پر وړاندې نارضایتي زیاته شوې ده. دغه اندېښنې حتی د جمهوري غوښتونکو ترمنځ هم لیدل کېږي.