کابل ټکی کام (پنجشنبه، ۱۰ غویی، ۱۴۰۵ل)
د کښتیو د تعقیب تازه سپوږمکي معلومات ښيي چې د امریکا له خوا اعلان شوې سمندري محاصره له جدي ننګونو سره مخ شوې ده. د معلوماتو له مخې، د تېرې ورځې د ماښام له ۱۷:۰۰ بجو څخه تر نن (د اپرېل ۲۹مه) د ماښام تر ۱۷:۰۰ بجو پورې، لږ تر لږه ۱۷ کښتۍ له دغې محاصرې څخه په بریالیتوب تېرې شوې دي.
سرچینې زیاتوي چې په دې کښتیو کې ۶ د تېلو ټانکرونه او ۱۱ نورې بار وړونکې کښتۍ شاملې دي، چې دا د نړیوالو سمندري تګ راتګ د دوام څرګندونه کوي.
همدارنګه، په همدې ۲۴ ساعتونو موده کې ۱۱ کښتۍ د هرمز له ستراتیژیک تنګي څخه تېرې شوې دي، چې له دې ډلې ۳ کښتۍ سیمې ته داخلې شوې او ۸ نورې له تنګي څخه وتلې دي.
شنونکي وايي، دغه شمېرې ښيي چې د امریکا اعلان شوې محاصره په بشپړ ډول ناکامه ده او لا هم سیمه کې سمندري تګ راتګ په عادي ډول روان دی.
