افغانستان په نړیوال شل اوریز جام کې دویم پړاو ته لار ومونده

کابل ټکی کام ۲۲کب/۱۳۹۴، ارین خان
د افغانستان د کرکټ ملي لوبډلې په یوه زړه پورې لوبه کې وکولای شوای، چې د ۵۹ منډو په تفاوت خپلې سیالې لوبډلې زمبابوې ته تاریخي شکست ور کړي.
په دې بري سره افغان کرکټ لوبډلې د نړیوال شل اوریز جام دویم پړاو ته لار ومونده.
افغانستان ملي لوبډلې د ۶ لوبغاړو د لاسه ور کولو سره په شلو اورونو کې ۱۸۶ منډې جوړې کړې، مګر زمبابوې په ۱۹م اور کې خپل ټول لوبغاړي له لاسه ور کړل.
دواړو لوبډلو د نړیوال شل اوریز جام په لومړي پړاو کې خپلو سیالو لوبډلو ته ماتې ور کړې وې.
د افغانستان د ملي لوبډلې دغه درېيمه پرلپسې بریا وه، چې له وجې یې د نړیوال شل اوریز جام دویم پړاو ته ځان شامل کړ.
محمد نبي عیسی خېل د ۵۲ منډو جوړولو او د یوه کس سوځولو له وجې د لوبې غوره لوبغاړی اعلان شو.
په لوبه کې محمد شهزاد په ۲۳ بالونو ۴۰ منډې جوړې کړې، د ده له سوځېدو وروسته د افغانستان درې لوبغاړي پرلپسې وسوځېدل، اصغر ستانکزی په صفر، نور علي ځدران په لسو او ګلبدین نایب په اوو منډو وسوځېدو، په دغه وخت کې افغان لوبغاړي تر سخت فشار لاندې وو، له اتم اور څخه وروسته په ۶۳ منډو د افغانستان ۴ لوبغاړي سوځېدلي وو، خو محمد نبي عیسی خېل او سمیع الله شینواري تر منځ د ۹۸ منډو په جوړولو ښه ملګرتیا وکړه، محمد نبي په ۳۲ بالونو ۵۲ او سمیع الله شینواري په ۳۷ بالونو ۴۳ منډې جوړې کړې.
افغانستان اوس د لسو غورو لوبډلو لومړي ګروپ لار ومونده، لومړی لوبه به یې له سرېلانکا، برتانیا، افریقا او وسټنډیز سره وي، لومړی سیالي به یې د مارچ په ۱۷مه نېټه له سرېلانکا سره وي.
د لسو غورو لوبډلو په دویم ګروپ کې اسټرالیا، هند او پاکستان شامل دي، د بنګله دېش او عمان تر منځ له سیالۍ وروسته به دا جوتیږي، چې کوم یو پنځم غړی شو.