کابل ټکی کام (یکشنبه، ۱۵ چنګاښ، ۱۴۰۴ل)
له غزې تړانګې او یمن څخه د اشغالي فلسطین پر لور توغندیز بریدونه شوي دي.
د فلسطیني مقاومت ډلو ویلي، چې له غزې څخه یې پر صهیونیستي اهدافو دقیق توغنديز بریدونه کړي، چې له امله یې اسراییلي پوځ ته درنه مرګ ژوبله اوښتې ده.
په ورته وخت کې، د یمني د ځواکونو ویاند اعلان کړی چې د توغندیو او بېپیلوټه الوتکو له لارې یې اشغالي فلسطین کې پر مهمو پوځي اهدافو بریدونه کړي دي. سرچینې وایي، بریدونه پر حیفا، تل ابیب او عسقلان شوي، چې له امله یې د درنو چاودنو غږونه اورېدل شوي دي.
د حماس او انصارالله ګډ بریدونه د اشغالګرو پر وړاندې د اسلامي مقاومت د یووالي څرګنده بېلګه ګڼل کېږي. د فلسطیني او یمني رسنیو له قوله، دا بریدونه د هغو جنایتونو غچ دی، چې صهیونیستي ریژیم د غزې د بې دفاع ولس پر وړاندې ترسره کړي دي.
د ویلو ده، چې د اسراییلي پوځ رسمي سرچینو تر اوسه د تلفاتو کره شمېر نه دی خپور کړی، خو د رسنیو د راپورونو له مخې، د یوشمېر پوځي مرکزونو سیسټمونه فلج شوي او بېړني حالت اعلان شوی دی.
