(کابل ټکی کام، سه شنبه، ۱۷ چنګاښ ۱۴۰۴):
اسرائيلي پوځ رسماً اعلان کړی، چې د غزې تړانګې په شمالي برخه کې د سختو جګړو په ترڅ کې يې لږ تر لږه ۵ پوځيان وژل شوي او ۱۴ نور ټپیان شوي دي.
د اسرائيلي پوځ په وینا، په وژل شوو سرتېرو کې دوه افسران هم شامل دي، او په ټپیانو کې د ځينو حالت نازک او د ژوند له جدي ګواښ سره مخ دي.
د اسرائيلي رسنيو د راپورونو له مخې، دغه جګړه د “يوې امنيتي پېښې” په ترڅ کې شوې، چې د حماس پوځي څانګې (کتائب القسام) له لوري ورته کمين ورکړل شوی دی.
کتائب القسام په خپله تبصره کې ويلي، چې دا کمين د اسرائيلي پوځ پر ضد د غبرګون په توګه ترسره شو، او دوی ژمنه کړې چې د دښمن د پوځ غرور به ورماتوي.
پرون ځايي سرچینو ويلي و، چې دغه پېښه د بیت حانون په سیمه کې رامنځته شوې، چیرته چې اسراییلي ځواکونه د ودانیو د تخریب او پلټنې په ماموریت بوخت و.
د مقاومت سرچینو “المیادین” تلویزیوني شبکې ته ویلي، چې جنګیالیو یې ودانۍ کې ماینونه ځای پر ځای کړي و او ودانۍ ته د صهیونیستي اشغالګرو د ننوتلو پر مهال یې چاودنه ورکړې ده.
ياده دې وي، چې په شمالي غزه کې نښتې ورځ تر بلې زور اخلي او د اسرائيلي ځواکونو پر وړاندې د مقاومت ځواکونو خپلې حملې پياوړې کړې دي.
