(کابل ټکی کام، سه شنبه، ۱۷ چنګاښ ۱۴۰۴):
د راپورونو له مخې، ایران له چين څخه د ځمکې څخه هوا ته د ویشتلو توغنديو (SAM) بټرۍ ترلاسه کړې دي. دا تسليمي د ایران او اسرائيلو ترمنځ د وروستۍ ۱۲ ورځنۍ جګړې وروسته، چې د جون په ۲۴مه اوربند وشو، ترسره شوې ده.
ويل کېږي چې تهران هڅه کوي د دغو توغنديو په مرسته خپلې هغه هوايي دفاعي وسيلې بيا ورغوي، چې د اسرائيلي هوايي بريدونو پر مهال له منځه تللې وې.
راپورونه زیاتوي چې ایران د دغو توغنديو د پېرلو لپاره د تېلو صادراتو څخه پیسې ورکوي، چې ورسره د چين او ایران ترمنځ سوداګریزې اړیکې نورې هم پیاوړې شوې دي.
چين دمګړی د ایران د خام تېلو شاوخوا ۹۰ سلنه صادرات اخلي او ډېری وخت د مالیزیا په څېر د دریمو هېوادونو له لارې یې تر امریکایي بندیزونو لاندې راوړي.
که څه هم د لېږل شوو توغنديو دقیق شمېر او ډولونه لا نه دي په ډاګه شوي، خو اټکل کېږي چې ایران بېلابېل چينايي او روسي دفاعي سیستمونه لري، لکه HQ-9 او د روسیې S-300.
سره له دې چې دغه دفاعي سیستمونه پرمختللي دي، کارپوهان وايي چې دا سیستمونه د اسرائيلو پرمختللو الوتکو، په ځانګړي ډول د امريکا جوړ F-35 پر وړاندې محدودې وړتیاوې لري.
سرچینه: ميډل ایسټ آی
