کابل ټکی کام (سه شنبه، ۱۷ چنګاښ، ۱۴۰۴ل)
د حماس اسلامي غورځنګ د پوځي څانګې “القسام” لېوا ویاند “ابو عبیده” ویلي، چې د بیت حنون عملیات سخت ګوذار و، چې د اشغالګر پوځ غرور یې مات کړ.
نوموړي زیاته کړې:
“د بیت حنون عملیات زموږ زړورو مجاهدینو هغه ساحه کې ترسره کړل، چې صهیونیستانو فکر کاوه نور پکې خطر نشته، حال دا چې موږ هلته د هغوی جنګي کنډکونه سخت وځپل او ګڼ اشغالګر پوځیان مو ووژل.
ابو عبیده وایي، مقاومت د اشغالګرو پر وړاندې د کمینې جګړې لاره غوره کړې، چې له شماله تر جنوبه د صهیونیستي پوځ پر ضد روانه ده او هره ورځ ورته درانه زیانونه اوړي.
نوموړی وایي:
“که څه هم اشغالګرو په دې وروستیو کې یو ځل بیا وتوانېدل چې خپل سرتېري له جحیم نه وباسي، خو دا امکان شته چې بیا ناکام شي او زموږ لاسته نور اسیران ولوېږي.”
دی زیاتوي، د فلسطیني ملت زړورتیا او د مقاومت د جنګیالیو پیاوړتیا ده، چې د جګړې بڼه یې په خپله خوښه وڅرخوله او اوس موږ کولی شو د غزې هره برخه کې اشغالګر ووژنو.
ابو عبیده خبرداری ورکړی، چې تر ټولو ښه پرېکړه به دا وي چې نتنیاهو خپل ځواکونه لا هم د غزې په دننه کې وساتي ترڅو لا ډېر ووژل شي.
