کابل ټکی کام (سهشنبه، ۷ زمری، ۱۴۰۴ل):
د کار او ټولنیزو چارو وزارت وايي، بهرنیو هېوادونو ته د افغان ماهرو او مسلکي کارګرانو د قانوني ليږد پروسه د ریاستالوزراء د اقتصادي مرستیال ملا عبدالغني برادر اخوند، د کار وزیر ملا عبدالمنان عمري، دولتي چارواکو، کارموندونکو شرکتونو او دیپلوماتانو په ګډون رسماً پیل شوه، چې ورسره به په هېواد کې د بې کارۍ کچه راکمه شي.
د کار وزیر ملا عبدالمنان عمري ويلي، له قطر شاهي دولت سره د کارګرانو د اعزام هوکړه لاسلیک شوې او له سعودي عربستان، متحده عربي اماراتو، عمان، ترکیې او روسیې سره هم ورته مذاکرات روان دي.
نوموړی زیاتوي چې افغان کارګران د اعتبار وړ دي او وزارت ژمن دی چې د هغوی قانوني حقونه خوندي وساتي او له غیرقانوني مهاجرتونو مخه ونیسي.
د قطر لپاره د ۲۰۰۰ افغان کارګرانو د نوملیکنې پروسه نن د هېواد په مرکز او زونونو کې پیلېږي.
