کابل ټکی کام (چهارشنبه، ۸ زمری، ۱۴۰۴ل):
د حماس ډلې پوځي څانګې، «کتائب القسام»، ویلي چې د خان یونس ښار په سوېل کې یې د صهیونیستي پوځ پر زغروالو وسایطو درې درنې چاودنې ترسره کړې دي.
القسام وايي، دغو چاودنو، چې د “البطن السمين” په سیمه کې د دوشنبې په ماښام شوي، د عبوات برمیلية یا درنو چاودېدونکو موادو په وسیله ترسره شوې، چې له امله یې د صهیونیستي پوځ په لیکو کې مرګژوبله رامنځته شوې ده.
کتائب القسام زیاتوي، چې د «حجارة داوود» عملیاتو په لړ کې دا برید ترسره شوی او دوی لا هم د اشغالګرو ځواکونو پر ضد د غزې په بېلابېلو سیمو کې بریدونه، کمینونه او مقاومت ته دوام ورکوي.
