کابل ټکی کام (چهارشنبه، ۲۲ زمری، ۱۴۰۴ل)
د اسلامي مقاومت غورځنګ حماس پوځي څانګې عزالدین القسام” د تېرې جولای میاشتې په اوږدو کې د غزې ختیځې شجاعیه سیمه کې د ترسره شویو عملیاتو جزییات خپاره کړي دي.
القسام ویلي، چې د جولای په ۴مه یې د غزې ښار ختیځ کې د شجاعیه په سیمه کې د «یاسین ۱۰۵» توغندي په وسیله یوه «مېرکاوا» ټانک په نښه کړ. له دې یوه ورځ وروسته یې په یوه کور، چې دننه یې اسرائیلي عسکر وو، د هاوان مرمۍ وویشتلې او عسکرو ته یې درنه مرګ ژوبله واړوله.
د جولای په نهمه نېټه هم قسام په همدې سیمه کې درې اسرائیلي عسکر په ډزو وویشتل، چې ځینې یې وژل شوي او نور ټپیان شوي دي.
سرچینې زیاتوي، چې تېره دوشنبه قسام په درې بریدونو کې د غزې په تړانګه کې دوه پوځي ځایونه په هاوانونو وویشتل او دوه عسکر یې ووژل.
سره له دې چې اشغالګرو په غزه کې پر پراخو سیمو بریدونه کړي، خو لا هم نه دي توانېدلي چې د مقاومت بریدونه او د دوی پر پوځي مرکزونو د توغندیزو بریدونو لړۍ ودروي، کوم چې وخت ناوخت د اسرائیلو ښارونه او کلي په نښه کوي.
د ۲۰۲۳م کال د اکتوبر له ۷مې د امریکا په ملاتړ اسرائیلو په غزه کې جګړه روانه ساتلې چې پکې قتل، لوږه، وراني او شړل شامل دي، او د نړیوالو د عبرګونونو او د نړیوالې محکمې د پرېکړو پروا نه کوي.
د فلسطیني چارواکو په وینا تر اوسه د اسرائیلي بریدونو له امله ۶۱ زره او ۴۹۹ فلسطینیان شهیدان، ۱۵۳ زره او ۵۷۵ ټپیان، له ۹ زره زیات ورک شوي او سلګونه زره کسان بېځایه شوي دي، همدارنګه لوږې د ګڼو خلکو، په ځانګړي ډول
د لسګونو ماشومانو ژوند اخیستی دی.
