کابل ټکی کام (چهارشنبه، ۲۲ زمری، ۱۴۰۴ل)
د اسلامي امارت مرکزی وياند ښاغلي ذبيح الله مجاهد ويلي، چې د اسلامي امارت د زعيم شيخ الحديث مولوي هبة الله اخندزاده په مشرۍ د کابینې څلورمه غونډه د ۱۴۴۷ هـ ق کال د صفر المظفر په ۱۸ نېټه په کندهار کې ترسره شوه. ښاغلي مجاهد په دې اړه په خپره کړې خبرپاڼه کې ويلي، چې د اسلامي امارت زعیم د کابینې غړو ته د مسئولیتونو د ښه ترسره کولو، د شرعي نظام د پلي کولو، د خلکو د ستونزو د حل او په اخلاص سره د خدمت کولو په اړه مهمې توصیې کړي دي.
نوموړی زياتوي، په غونډه کې پرېکړه وشوه چې کابل ښاروالي به په اړینو سیمو کې جوماتونه جوړ او د ارشاد، حج او اوقافو وزارت ته وسپاري. همداراز د بندیانو د وضعیت او دوسیو په اړه بحث شوی او اړوندو ادارو ته د څېړنو او ارزونې دنده سپارل شوې.
زياتوي په غونډه کې د جوماتونو، مدرسو، ښوونځیو او پوهنتونونو د پیاوړتیا لپاره اړوندو وزارتونو ته د ارزونې او د درسي سیستمونو د احیا سپارښتنه شوې او ښاغلي هبت الله اخندزاده د فکري اختلافاتو د مخنیوي او د اسلامي امت د یووالي پر اړتیا ټینګار کړی دی.
