کابل ټکی کام (دوشنبه، ۲۷ زمری، ۱۴۰۴ل)
ملګري ملتونه وايي، په افغانستان کې د وچکالۍ، جبري ستنېدونکو او بشري مرستو د کمښت له امله د لوږې خطر بېساری شوی دی. د خوړو نړیوال پروګرام (WFP) د افغانستان مشر جان ایلیف ویلي، د روان ژمي پر مهال ښايي له ۱۰ تر ۱۵ میلیونه افغانان د خوراکي مرستو اړ شي.
ایلیف ټینګار کړی، چې د شپږو میاشتو لپاره لږ تر لږه ۵۳۹ میلیونه ډالرو ته اړتیا ده، خو په ۲۰۲۵ کال کې یوازې ۱۵۵ میلیونه ډالر برابر شوي دي.
دا په داسې حال کې ده، چې په ۲۰۲۲ کې دغه مرسته ۱.۶ میلیارده ډالره وه.
د WFP په وینا، دا مهال یوازې د نږدې یو میلیون کسانو لپاره د خوراکي توکو برابرولو توان لري، حال دا چې په تېر کال کې یې پنځه میلیونه کسانو ته مرستې رسولې وې.
د ادارې د خبرتیا له مخې، که بودیجه برابره نه شي، د اکتوبر له میاشتې وروسته مرستې نږدې په بشپړ ډول بندېږي.
