کابل ټکی کام (شنبه، ۱ وږی، ۱۴۰۴ل)
د افغان مهاجرینو د چارو اړوند مسؤلین وايي، هغه افغان مهاجرین چې په پاکستان کې مېشت دي او بېرته خپل هېواد افغانستان ته ستنېږي، باید د خپلو POR کارتونو کاپي یا روښانه انځورونه له ځان سره ولري.
سرچینې زیاتوي، مهاجرین که په خپله خوښه هېواد ته ستنېږي او که د پاکستاني پولیسو له لوري له هېواده ایستل کېږي، باید مخکې له دې چې پولیس یې د POR کارتونه ترې واخلي، حتمي یې کاپي یا د دواړو مخونو انځورونه په موبایل کې وساتي.
د یادونې وړ ده، چې که مهاجر له خپل کارت پرته تورخم بندر ته ورسېږي، د چارواکو په وینا، هلته ورسره هېڅ ډول مرسته نه کېږي.
دا په داسې حال کې ده چې پاکستان ټولو افغان مهاجرينو ته د اګست تر وروستۍ نيټې وخت ورکړی چې بايد په خپله خوښه هېواد ته ستانه شي او ويلي دي که له يادې نيټې وروسته هم افغانان دغه هېواد کې پاتې شي نو قانوني چلند به ورسره کيږي.
