افغانستان د پرمختګ پر لور

په داسې حال کې چې څلور کاله کېږي د افغانستان واګې د اسلامي امارت په لاس کې دي، د دې مودې تر ټولو ستره ځانګړنه سرتاسري امنیت بلل کېږي. هغه هېواد چې کلونه د جګړو، بې‌ثباتۍ او تاوتریخوالي شاهد و، نن د خلکو د ورځني ژوند سکون او د پانګونې د خوندیتوب له برکته د بدلون نوي پړاو ته داخل شوی دی.
د امنیت تر څنګ د اقتصادي برخې پرمختګونه هم د پام وړ دي. د اوبو د مدیریت په برخه کې د قوشتیپې کانال ستره پروژه د هېواد د کرنیز تحول بنسټ ګڼل کېږي. د کانال له بشپړېدو سره به نه یوازې د کرنیزو حاصلاتو کچه لوړه شي، بلکې د خوړو د خپلواکۍ په برخه کې به افغانستان پر ځان بسيا شي. همدارنګه د څو مهمو بندونو کارونه پیل شوي، چې د برېښنا تولید او د اوبو زېرمه کولو دواړو برخو کې به اغېزمن ثابت شي.
د انرژۍ او ترانزیټ برخه کې د ټاپي پروژه د سیمه‌ییز اتصال یوه مهمه کړۍ ده. د دې پروژې پرمختګ به افغانستان د سیمې د اقتصاد په محور بدل کړي او د عوایدو یوه نوې دروازه به پرانیزي. له دې سره موازي، د صنعت او تولید په برخه کې هم وده لیدل کېږي. د کورنیو تولیداتو کچه لوړه شوې او د صادراتو پراخوالی د افغانستان د اقتصادي پیاوړتیا ښه نښه ده.
خو سره له دې، لا هم د دې ټولو لاسته راوړنو د دوام لپاره اساسي اړتیا د تخصصي کادرونو روزنه، د پانګونې لپاره لا زیاتې اسانتیاوې او د نړیوالو اقتصادي اړیکو پراخول دي. که دا برخې په منظم ډول پیاوړې شي، افغانستان کولای شي په نږدې راتلونکي کې له مصرفوونکي هېواد څخه د تولیدوونکي او صادرونکي هېواد په حیث راڅرګند شي.
څلور کاله د افغانستان د نوې تجربې کلونه بلل کېږي. امنیت، سترې اقتصادي پروژې او د صادراتو زیاتوالی د تمې څراغونه بل کړي دي. اوس مهال د هېواد د پرمختګ لپاره تر ټولو ستر مسؤلیت د خلکو، پانګوالو او چارواکو په ګډه همکارۍ کې دی. که دا فرصتونه په سمه توګه مديريت شي، افغانستان به د سیمې اقتصاد او سیاسي ثباترته یوه بېلګه وګرځي.