کابل ټکی کام (یکشنبه، ۲ وږی، ۱۴۰۴ل)
له یمن ورکړل شوي راپورونه وایي، چې د صهیونیستي رژیم جنګي الوتکو پر پلازمېنه صنعا او شاوخوا سیمو وحشیانه هوایي بریدونه کړي دي. د یمني رسنیو د راپورونو له مخې د بریدونو کې د ځینو پوځي اهدافو تر څنګ، د انصارالله اسلامي غورځنګ د مشر عبدالملک حوثي اړوند یوه دیني مدرسه هم په نښه شوې ده.
ځايي رسنۍ وایي چې له بریدونو وروسته د ښار په څو برخو کې د درنو چاودنو غږونه اورېدل شوي دي.
د بریدونو له امله د تلفاتو په اړه کره معلومات لا تر اوسه نه دي خپاره شوي.
د انصارالله اسلامي غورځنګ د رسنیو دفتر مشر “نصرالدین عامر” بیا پر خپله اېکس پاڼه ادعا کړې، چې یمني ځواکونو په بریالیتوب سره د صهیونیستي ريژیم بریدونه شنډ کړي دي.
د ویلو ده، چې دغه هوایي بریدونه په داسې حال کې ترسره کېږي، چې یمني ځواکونو په تېرو ۷۲ ساعتونو کې پر اسرائیلي اهدافو ګڼ بریدونه کړي او ژمنه یې کړې چې د فلسطین تر بشپړې آزادۍ پورې به یې عملیات دوام لري.
