کابل ټکی کام (دوشنبه، ۳ وږی، ۱۴۰۴ل)
د ټولګټو وزارت وايي، په تېره اوونۍ کې د افغانستان د اوسپنې پټلۍ له لارې ۸۰ زره ۲۵۲ مټریک ټنه بېلابېل توکي انتقال شوي دي. دغه انتقالات د ۱۴۰۴ هـ.ش کال د اسد له ۲۴مې نېټې څخه د همدې مياشتې تر ۳۰مې ترسره شوي دي.
د وزارت د معلوماتو له مخې، له حیرتان بندر څخه ۴۵ زره ۵۲۳ ټنه، د آقینې له لارې ۱۱ زره ۸۷۱ ټنه، د تورغونډۍ له لارې ۹ زره ۳۴۷ ټنه او د خواف – هرات له لارې ۱۳ زره ۵۱۱ ټنه توکي انتقال شوي دي. په دې کې نفتي، غیر نفتي او نور تجارتي مواد شامل دي، چې هېواد ته وارد او یا ترې صادر شوي دي.
سرچینه زیاتوي، چې په تېره اوونۍ کې د صادراتو کچه ۱۲۹ ټنه وه، چې ډېره برخه یې معدني ډبرې دي. د وزارت په وینا، د اوسپنې پټلۍ د انتقالاتو د زیاتېدو سره کاري فرصتونه، ملي عواید او د هېواد اقتصادي ثبات وده کوي او هڅې روانې دي، څو سوداګرو ته لا زیاتې اسانتیاوې برابرې شي.
