کابل ټکی کام (جمعه، ۷ وږی ۱۴۰۴):
د خوړو د نړيوال پروګرام اجرائيه مشرې سينډي مکين ويلي، د غزې ښځې او ماشومان له سختې لوږې سره مخ دي او هغې دغه حالت د اسرائيلو لومړي وزير بنيامين نتنياهو سره رسماً شريک کړی دی او نوموړي ته يې خبرداری ورکړی دی. نوموړې ويلي، د دې اوونۍ د غزې سفر پر مهال يې په ښکاره ليدلي چې هلته کافي خواړه نشته.
مکين د اسوشيېټېډ پرېس اژانس ته ويلي، د غزې په ښارونو کې لوږه او مرګ ژوبله روانه ده او که اوربند ونه شي او د مرستو پر لګول شوو بنديزونو کې نرمښت رانه شي، نو قحطي به په ټوله غزه کې خپره شي.
د غزې د روغتيا وزارت د تازه شمېرو له مخې، د لوږې له امله د مړو شوو کسانو شمېر ۳۱۷ ته رسېدلی چې ۱۲۱ يې ماشومان دي.
