جوزجان کې د دوستمي او جمعیتي ملېشو تر منځ جګړه، ۱۴ کسانو ته مرګ ژوبله اوښتې

کابل ټکی کام ۲۶کب/۱۳۹۴، احمدالله مهاجر
جوزجان کې د دوستمي او جمعیتي ملېشو تر منځ جګړه، ۱۴ کسانو ته مرګ ژوبله اوښتې
نن ماسپښین له جوزجان ولایت څخه داسې خبرونه خپاره کړی شول، چې د دوستمي او جمعیتي ملېشو تر منځ سخته جګړه روانه ده، چې اوس ماښام پای ته ورسېده.
دغه جګړه چې د یاد ولایت د فیض اباد ولسوالۍ په ګرجک سیمه کې پېښه شوې وه، دواړو ډلو ته د تلفاتو په اوړېدو پای ته ورسېده.
خبرونه وايي، چې د یادې جګړې په پایله کې د جمعیتي ملېشې د قومندان سلیم په ګډون ۲ تنه نور جنګیالي وژل شوي، او ۲ تنه نور یې مرګوني ټپیان شوي دي.
د خبرونو پر اساس چې په دغه جګړه کې د دوستمي ملېشو ۲ تنه جنګیالي هم مرګوني ټپیان دي.
ځايي سرچینې وایي، چې د دواړو ډلو تر منځ د جګړې پر مهال طالبان هم سیمې ته را ورسېدل، او په دواړو ډلو یې بریدونه پیل کړل.
د سرچینې د مالوماتو پر اساس چې د طالبانو په دغه برید کې د دواړو ډلو ۳ تنه جنګیالی وژل شوي، او ۴ تنه نور یې تپیان دي.
د یادولو ده، چې د ولسمشر لومړی مرستیال جنرال عبدالرشید دوستم جوزجان ته په دې موخه ولاړو، تر څو له طالبانو څخه د وژل شویو اردو ځواکونو انتقام واخلي، خو د طالبانو سره یې په جګړه کې ماتې وخوړه، او په ګوندي جګړه یې لاس پورې کړ.