کابل ټکی کام (دوشنبه، ۱۷ وږی ۱۴۰۴):
د روسیې د بېړنیو حالاتو وزارت خبر ورکړی چې د افغانستان ختیځ کې د زلزله ځپلو لپاره یې نن دویمه جوپه ۲۰ ټنه بشري مرسته استولې ده.
په دې مرسته کې کمپلې او خیمې شاملې دي چې د ولسمشر ولادیمیر پوتین په حکم لېږل شوې دي.
یاد وزارت زیاتوي، د ال-۷۶ ډوله الوتکې په وسیله یادې مرستې د روسیې له ژوکوفسکي هوايي ډګر څخه د افغانستان پر لور ولېږدول شوې.
دا مرسته هغو کورنیو ته رسول کېږي چې د تېرې اوونۍ زلزلې یې کورونه ویجاړ کړي دي.
روسیې درې ورځې وړاندې هم ورته ۲۰ ټنه بشري مرسته کابل ته رالېږلې وه.
د تېرې دوشنبې د شپې زلزلې تر ټولو ډېر زیان په کونړ ولایت کې اړولی، چې د وروستیو رسمي شمېرو له مخې تر اوسه لږ تر لږه ۲۲۰۵ کسان مړه او له ۳۶۴۰ ډېر ټپیان شوي دي او شاوخوا اووه زره کورونه يې ويجاړ کړي دي.
