کابل ټکی کام (شنبه، ۲۲ وږی، ۱۴۰۴ل)
د افغانستان اسلامي امارت د بهرنیو چارو وزیر مولوي امیر خان متقي نن په کابل کې د امریکا د پخواني ولسمشر ډونلډ ټرمپ د ځانګړي استازي اډم بولر په مشرۍ پلاوي سره وکتل. په دې پلاوي کې د افغان سولې لپاره د امریکا پخوانی ځانګړی استازی ډاکټر زلمی خلیلزاد هم شامل و.
د افغانستان د بهرنیو چارو وزارت وایي په دې ناسته کې دواړو لوریو د دوو اړخیزو اړیکو د پراختیا، يو او بل هېواد کې د بندي اتباعو د قضیو، او په افغانستان کې د پانګونې په ګډون پر بېلابېلو موضوعاتو خبرې کړي.
د بهرنيو چارو وزارت خبرپاڼه کې راغلي چې د ليدنې پر مهال د اسلامي امارت د بهرنیو چارو وزیر وویل، اوس ښه فرصت برابر شوی چې اړیکې عادي حالت ته راوګرځول شي او د دواړو هېوادونو ترمنځ پېچلې ستونزې نه شته.
امریکايي پلاوي د خبرو پر دوام ټینګار وکړ او د افغانستان په ختیځو ولایتونو کې د وروستۍ زلزلې له امله یې خواخوږي څرګنده کړه.
د پلاوي مشر وویل، هېواد یې د ملتونو د انتخاب ازادۍ ته درناوی لري او نه غواړي پر افغانانو څه وتپي. دواړو لوریو ژمنه وکړه چې د تېرو مذاکراتو په تعقیب د ښې پایلې لپاره هڅې وکړي.
