کابل ټکی کام (يکشنبه، ۲۳ وږی، ۱۴۰۴ل)
د افغانستان د ټولګټو وزارت له لوري د خواف – هرات د اوسپنې پټلۍ د څلورمې قطعې دوهم فاز چارې د ۵۴ میلیونه ډالرو په لګښت پیل شوې، چې د بشپړېدو وروسته به د دې پټلۍ پروژه په بشپړ ډول ګټې اخیستنې ته وسپارل شي.
د ټولګټو وزارت د اوسپنې پټلۍ مرستیال مولوي محمد اسحاق صاحبزاده د پرانيستې پر مهال وویل، د یادې پټلۍ له بشپړېدو سره به افغانستان د منځنۍ آسیا، جنوبي آسیا او منځني ختیځ ترمنځ د نښلونکې څلورلارې په توګه وپېژندل شي. د پروژې لګښتونه د کانونو او پټرولیم وزارت له منابعو برابرېږي او چارې به یې د دوو کلونو په موده کې بشپړې شي.
د هرات والي شیخ مولانا اسلام جار ټینګار وکړ چې دا پروژه به هرات د ترانزیټ او سوداګرۍ پر مهم مرکز بدل کړي او د بندر عباس – هرات لګښتونه به د یو ټن مال لپاره د ۱۳۰ ډالرو څخه ۴۰ ډالرو ته راکم شي.
د خواف – هرات ټولټال ۲۲۶ کیلومتره اوږدوالی لري، چې ۷۷ کیلومتره یې د ایران په خاوره او پاتې ۱۴۹ کیلومتره یې د افغانستان په خاوره کې موقعیت لري.
